‘सुख‘, ‘दू:ख‘ , ‘जीवन‘, ‘क्यानाडा‘ तथा ‘भ्यानकुवेर‘ भनेको के रहेछ? 

‘सुख‘, ‘दू:ख‘ , ‘जीवन‘, ‘क्यानाडा‘ तथा ‘भ्यानकुवेर‘ भनेको के रहेछ? 

मानकाजी ‘ज्येना‘ (२०। ०१। २०२०)

‘ज्येना‘ भइएपछि, घैँटोमा घाम लागेछ,

एउटा कुरा बल्ल बुझेँ जस्तो लागि रहेछ

‘सुख‘ भनेको —‘झोल‘ र ‘दू:ख‘ भनेको —‘चौटा‘ रहेछ, 

अनि ‘जीवन‘ भनेको सहस्र प्वाले जाली रहेछ,

जहाँ ‘सुख‘ जति सबै छिरी निमेषभर मै विलाइजाने,

‘दू:ख‘ चाहिँ अड्की रहने, लिस्सो टाँस्सिए झैँ टाँस्सि रहने।

त्यति मात्र कहाँ हो र ? सुकेको लुतो झैँ चिलाइ रहने 

जत्ति कन्याए पनि, खस-खस, खस-खस भइरहने  ।

अनि, अनि —

‘क्यानाडा‘ आउनुभनेको —‘चौटा‘ खान गा’ बुढी ‘झोलमा‘ डूबी भने झैँ रहेछ,

‘भ्यान—कुवेर‘ आइ ‘उबेर‘ चढ्दा चाहिँ—क्यनाडाली ‘कुवेर‘ भइने रहेछ।